Қаҳрамони мусобиқоти футболи Лигаи олии ҷумҳурӣ дар соли гузашта – дастаи «Истиқлол»-и Душанбе аз вазъи майдони футболи варзишгоҳи марказии пойтахт қаноатманд набуда, вохӯрии дуюми чемпионати имсоларо низ дар майдони бетараф доир месозад.
Бино ба маълумоти хадамоти матбуоти дастаи мазкур, ҳамин тариқ рӯзи 14-уми апрел вохӯрии даста бо тими «Хайр»-и шаҳри Ваҳдат дар варзишгоҳи «Металлург»-и шаҳри Турсунзода (57 километрии ғарби шаҳри Душанбе) баргузор мешавад.
Гуфта мешавад, майдони фуболи варзишгоҳи «Авиатор»-и шаҳри Душанбе низ дар ҳолати хеле бад қарор дорад. Соли гузашта дастаи «Истиқлол» бештари вохӯриҳои худро дар ин варзишгоҳ баргузор мекард.
Ёдрас мекунем, ки соли гузашта ба муддати се моҳ дар варзишгоҳи марказии пойтахт (қаблан варзишгоҳи ҷумҳуриявии ба номи Фрунзе) корҳои таъмир анҷом дода шуданд. Ба қавли мақомоти раҳбарии варзишгоҳ, дар ин давра майдони футболи варзишгоҳ ба тартиб оварда шуда, барои нишасти мухлисон курсиҳои пластикӣ гузошта шуданд, ки пас аз ин ғунҷоиши стадион ба 20 ҳазору 145 нафар расид.
