Президенти нахустини Тоҷикистон Қаҳҳор Маҳкамов барои саҳми босазо дар рушду таҳкими робитаҳои байнипарлумонӣ ба ордени тилои «Ассамблеяи байнипарлумонии ИДМ-20 сол» сарфароз гардонида шуд.
Тавре ба ОИ «Азия-Плюс» ёвари раиси Маҷлиси миллии Маҷлиси Олии Тоҷикистон Шавкат Саидов хабар дод, раиси палатаи болоии парлумон Маҳмадсаид Убайдуллоев ва собиқ раиси палатаи поёнии парлумони кишвар, феълан аъзои Маҷлиси миллӣ Сайдулло Хайруллоев низ бо чунин медал қадрдонӣ шудаанд.
Ба гуфтаи Шавкат Саидов, раиси вилояти Суғд, муовини раиси палатаи болоии парлумон Қоҳир Расулзода ба мукофоти олии ИДМ – ордени «Иттиҳод» ва аъзои Маҷлиси миллӣ Мамадшо Илолов ва Хусрав Абдуназаров бо медалҳои нуқраи «АБП ИДМ-20 сол» сазовор дониста шудаанд.
«Раиси ВМКБ ва ҳамзамон муовини раиси палатаи болоии парлумон Қодири Қосим, раиси вилояти Хатлон, узви Маҷлиси миллӣ Ғайбулло Афзалов, собиқ узви Маҷлиси миллӣ ва феълан муовини аввали нахуствазир Матлубхон Давлатов, собиқ узви Маҷлиси миллӣ, вазири маорифи ҷумҳурӣ Нуриддин Саидов бо ифтихорномаҳои АБП ИДМ қадрдонӣ шуданд», – зикр кард Саидов.
Ба қавли номбурда, аъзои Маҷлиси миллии Тоҷикистон Абдулҳафиз Азизов ва Садриддин Шарифов ба ифтихорномаҳои АБП Иттиҳоди иқтисодии АвруОсиё сазовор дониста шудаанд.
