Душанбе. 13-уми ноябр. ОИ «Азия-Плюс» – Дар мусоҳиба ба хабарнигори ОИ «Азия-Плюс» роҳбари департаменти иттилооти Вазорати корҳои хориҷии Тоҷикистон Давлат Назриев изҳор дошт, ки хориҷ гаштани Ӯзбекистон аз Иттиҳоди иқтисодии Авруосиё (ЕврАзЭС) ба муносиботи Тоҷикистон бо кишвари ҳамсоя таъсир нахоҳад гузошт.
Ба қавли ӯ, миёни Тоҷикистону Ӯзбекистон ҷиҳати ҳамкории пурсамар дар бахшҳои гуногун ба қадри кофӣ асноди меъёриву ҳуқуқии шартномавӣ ба тасвиб расидаанд.
Номбурда зикр кард, ки ҳар кишваре дар масъалаи иштирок дар ин ё он созмону иттиҳод комилҳуқуқ аст. «Тоҷикистон бо кишвари ҳамҷавор ҳам дар доираи муносиботи дуҷониба ва ҳам бар асоси муносибот дар чаҳорчӯбаи СММ, ИДМ, СҲШ ва СААД ҳамкорӣ хоҳад кард», – афзуд ӯ.
