Душанбе. 13-уми ноябр. ОИ «Азия-Плюс» – Газетаи «Новие известия» бо истинод ба муовини директори Донишкадаи кишварҳои узви Иттиҳоди Давлатҳои Мустақил Владимир Жарихин хабар медиҳад, ки феълан дар қаламрави пасошӯравӣ кишварҳои Тоҷикистон, Қирғизистон ва Молдова аз ҳама камтар аз бӯҳрони молиявии ҷаҳонӣ хисорот бардоштаанд. «Ба ин кишварҳо мавҷи дуввуми бӯҳрон, ки бар асари он коҳиши суръати афзоиш ба амал омада, талабот ба захоири ашёи хом ва ғизо камтар мешавад, таъсир хоҳад гузошт ва он пас аз гузашти ним сол ба вуқӯъ хоҳад пайваст», – гуфтааст ӯ.
Дар шарҳи ин изҳороти коршиноси русиягӣ, доктори улуми иқтисод, профессор, мудири шӯъбаи Пажӯҳишгоҳи иқтисодии Вазорати рушди иқтисод ва савдои Тоҷикистон Ҳоҷимуҳаммад Умаров чунин ибрози назар кард, ки оқибатҳои бӯҳрони молиявии ҷаҳонӣ аллакай ба Тоҷикистон асар карда истодаанд. «Имрӯз ба мо хабарҳое мерасанд, ки ҳаҷми маблағи интиқолии муҳоҷирони тоҷик ба ватан коҳиш ёфтааст ва ба он аз кор хориҷ гаштани ҳамватанони мо дар ширкатҳои сохтмонӣ боис шудааст», – гуфт ӯ.
Ҳ.Умаров таъкид сохт, ки баъди чанде дар Тоҷикистон арзиши маводи ғизоӣ боло хоҳад рафт. «Алҳол арзиши маводи ғизо ва сӯзишворӣ дар Тоҷикистон коҳиш хоҳад ёфт, вале ба иллати поин рафтани ҳаҷми истеҳсолоти ин мавод дар миқёси ҷаҳон дар ҷумҳурии мо низ нархҳо боло хоҳанд рафт», – афзуд олим.
