Бо фармони президенти Тоҷикистон Эмомалӣ Раҳмон 2 нафар сокини ноҳияи Тоҷикобод барои ҳамкорӣ ва кӯмак расонидан ба мақомоти корҳои дохилӣ дар мубориза бар зидди ҷинояткорӣ бо «Ифтихорномаи Ҷумҳурии Тоҷикистон» сарфароз гардонида шуданд.
Дар остонаи таҷлили ҷашни Истиқлолияти давлатии ҷумҳурӣ дар Вазорати корҳои дохилии ҷумҳурӣ маросими тантанавии тақдими унвону ҷоизаҳо доир гардид.
Бино ба маълумоти маркази матбуоти Вазорати корҳои дохилии ҷумҳурӣ, котиби Шӯрои амнияти Тоҷикистон Абдураҳим Қаҳҳоров аз номи роҳбари давлат Президенти Ҷумҳурии Тоҷикистон Эмомалӣ Раҳмон кормандони мақомоти корҳои дохилиро бо ин ҷашни фархунда табрику таҳният гуфта, ба як қатор кормандон мукофотҳои давлатӣ супорид.
Инчунин, Вазири корҳои дохилӣ Рамазон Раҳимов ба собиқадорон ва оилаҳои кормандони ҳангоми адои вазифа фавтидаи мақомоти корҳои дохилӣ мукофотпулӣ тақдим намуда, варзишгарон – аъзои ҷамъияти варзишии «Динамо»-и Вазорати корҳои дохилиро, ки дар бозиҳои 30-уми олимпиадаи Лондон ба натиҷаҳои назаррас ноил гардиданд, бо мукофотҳои қиматнок сарфароз гардонид. Аз он ҷумла, ба Мавзуна Чориева дастгоҳи наворбардорӣ ва маблағи муайяни пулӣ ва ба устодаш низ маблағи муайяни пулӣ тақдим намуд. Ҳамзамон, Вазири корҳои дохилӣ аз номи мардуми Бадахшон ба Мавзуна Чориева сарулибоси бадахшониро супорид.
