Қарори раиси шаҳри Душанбе Маҳмадсаид Убайдуллоев дар бораи бо роҳи азнавташкилдиҳӣ ба Корхонаи воҳиди давлатӣ «Оид ба истеҳсол, харид, захира ва фурӯши маҳсулоти ниёзи аввалия дар шаҳри Душанбе» ҳамроҳ намудани Корхонаи воҳиди давлатии «Бозори Қарияи боло» ба имзо расид, ки мутобиқи он тамоми амволи бозор ба тавозуни ин корхона мегузарад.
Бино ба маълумоти мақомоти шаҳрдории пойтахт, ин тасмим бо мақсади ба вуҷуд овардани шароити мусоид, ғанӣ гардонидани бозори истеъмолии шаҳр бо молу мавод ва пешгирии болоравии нархҳои маҳсулоти ниёзи аввалия ба тасвиб расидааст.
Ба иттилои манбаъ, барои иҷрои қарори мазкур комиссия таъсис дода шуда, он дар мӯҳлати ду ҳафта тибқи санади дахлдор қабулу супоридани иншоотро тартиб ва барои тасдиқ ба раиси шаҳри Душанбе пешниҳод менамояд.
