Вазири корҳои хориҷии Тоҷикистон Ҳамрохон Зарифӣ сафири Конфедератсияи Швейтсария Стефан Нелленро бинобар ба итмом расидани мӯҳлати хизмати дипломатиаш дар ҷумҳурӣ ба ҳузур пазируфт.
Тавре аз Вазорати корҳои хориҷии ҷумҳурӣ иттилоъ доданд, дар ҷараёни мулоқот ҷонибҳо доир ба ҳамкориҳои дуҷониба, инчунин вазъият дар минтақа бо назардошти хурӯҷи нерӯҳои байналмилалӣ аз Афғонистон то соли 2014 табодули афкор намуданд.
Ба иттилои манбаъ, сафир Стефан Неллен барои мусоидат ва дастгирӣ дар давоми фаъолияти дипломатиаш дар Тоҷикистон ба Вазири корҳои хориҷӣ изҳори миннатдорӣ намуд.
Зимнан зикр гардид, ки дар анҷоми мулоқот вазири корҳои хориҷӣ ба сафири Швейтсария муваффақияти комилро дар фаъолияти минбаъдаи касбӣ таманно кард.
