Мақомоти ҳифзи ҳуқуқи Русия шаҳрванд Давлатшо Кӯчакшоеви 40-соларо ба ихтиёри мақомоти салоҳиятдори Тоҷикистон супурданд.
Бино ба иттилои торнамои расмии Прокуратураи генералии Русия, Д.Кӯчакшоев моҳи октябр ба мақомоти Тоҷикистон супурда шудааст. Номбурда аз соли 2009 аз ҷониби мақомоти Тоҷикистон барои даст доштан дар содир намудани ҷиноятҳо мутобиқи моддаҳои 181 (Ғасби гаравгон) ва 186 (Бандитизм)-и КҶ ҶТ мавриди ҷустуҷӯ қарор дошт.
Бино ба фарзияи тафтишот, соли 1999 дар шаҳри Душанбе Д.Кӯчакшоев дар ҳайати як гурӯҳи мусаллаҳи ҷиноятпеша чор нафарро гаравгон гирифта, аз наздикони онҳо пардохти 15 ҳазор доллари ИМА барои озодии гаравгононро талаб менамоянд.
Моҳи ноябри соли 2011 Кӯчакшоеви таҳти пайгарди қонунии байнулмилалӣ қарордоштаро кормандони пулиси Русия дар қаламрави ноҳияи Подолски вилояти Маскав боздошт карда, маводи парвандаи ӯ ҷиҳати баррасӣ ба Прокуратураи генералии Русия ирсол гардид.
Аз рӯи натоиҷи баррасӣ қарор шуд, ки Кӯчакшоев барои ба ҷавобгарӣ кашидан ба мақомоти Тоҷикистон супурда шавад, вале Кӯчакшоев ба ин розӣ нашуда, аз болои қарори Прокуратураи генералии Русия ба Суди Олии ин кишвар шикоят бурд. Суди Олии Русия қарори зикршударо қонунӣ ва асоснок арзёбӣ намуд.
Ба туфайли амали муштарак ва фаврии мақомоти марбутаи Русия, Кӯчакшоев барои ҷавоб гуфтан ба ҷиноятҳои содирнамудааш ба мақомоти салоҳиятноки Тоҷикистон супурда шуд.
