Ба Фестивали байнулмилалии кино 4 филми тоҷикӣ пешниҳод мегардад

Душанбе. 9-уми июн. ОИ «Азия-Плюс» – Ба Фестивали III-уми байнулмилалии кино, ки аз 5 то 10-уми июл дар Кобул баргузор мегардад, 4 филми истеҳсоли Тоҷикистон пешниҳод мегардад. Сафар Ҳақдодов, мудири ҶДММ «Киносервис» ба ОИ «Азия-Плюс» хабар дод, ки дар фестивал филми ҳуҷҷатии Ҳунарманди мардумии Тоҷикистон, драматург ва актер Шодӣ Солеҳ ба унвони «Нони Раштон» ва ҳамчунин филмҳои ҳунарии кӯтоҳмуддати коргардонҳои ҷавон Денис Бекетов «Равшанӣ», Зулфия Содиқова «Гул» ва Искандар Усмонов «Ҳаром ва ҳалол» намоиш дода мешаванд. «Тоҷикистонро дар фестивал танҳо Шодди Солеҳ намояндагӣ мекунад», – изҳор дошт С.Ҳақдодов. «Ёдовар мешавем, ки фестивали мазкур дар шаҳри Кобули Ҷумҳурии Исломии Афғонистон маротибаи саввум баргузор мешавад. Фестивали нахустин соли 2005 доир гашт ва ба он филмҳои коргардонҳои Афғонистон, Олмон ва Фаронса пешниҳод гардида буданд.