Душанбе. 20-уми октябр. ОИ «Азия-Плюс» – Дар шаҳри Душанбе як корманди милиса кушта шуд. Субҳи 19-уми октябр сержанти милисаи шӯъбаи Хадамоти
давлатии посдории шӯъбаи умури дохилии ноҳияи Синои пойтахт Одина Давлатов ҳадафи тири қотил қарор гирифт. Ҷинояткор ба сари милиса тир холӣ кардааст.
Сардори маркази матбуоти Вазорати умури дохилии ҷумҳурӣ Маҳмадулло Асадуллоев дар сӯҳбат бо хабарнигори ОИ «Азия-Плюс» изҳор дошт, ки ҳодиса дар давоми соатҳои аз 5 то 7-и субҳ рух додааст.
«Қотил ба бинои шӯъбаи бонк ворид гардида, аслиҳаи хидматии милисаро мегирад ва бо он ба пешонии О.Давлатов тир холӣ мекунад, ки бар асари он милиса дар ҷои ҳодиса ба ҳалокат мерасад», – гуфт ӯ.
Аз шарҳи ҷузъиёти дигари ҳодиса худдорӣ карда шуд. Тафтиши ҳодисаи ба қатл расонидани сержанти милиса ба зиммаи гурӯҳи фавриву тафтишотӣ таҳти сарварии муовини вазири умури дохилии ҷумҳурӣ Шариф Назаров вогузор гашт.
