Душанбе. 9-уми декабр. ОИ «Азия-Плюс» – Дар вохӯрии вазири маорифи ҷумҳурӣ Абдуҷаббор Раҳмонов бо сафири Эрон дар Тоҷикистон Алиасғари Шеърдӯст тавофуқ ҳосил гардид, ки дар макотиби олии Тоҷикистон миқдори квотаҳо барои донишҷӯёни эронӣ ду баробар афзуда мешавад.
Тибқи маълумоти хадамоти матубуоти вазорати маориф, бо дархости дипломати эронӣ вазир ба сохторҳои дахлдор супориш додааст, ки миқдори квотаҳо барои донишҷӯёни эронӣ ду баробар – аз 10 то 20 нафар зиёд карда шавад. Феълан шумори донишҷӯёни тоҷик дар макотиби олии Эрон ба 50 нафар баробар аст.
Дар мулоқот ҳамчунин дурнамои рушди ҳамкориҳо дар соҳаи маориф мавриди баррасӣ қарор гирифт. Сафири Эрон ба масъалаи ҷараёни нашри китобҳои дарсӣ ва адабиёт барои кӯдакон, ки ҷиҳати он вазорати маорифи Эрон маблағ ҷудо карда буд, таваҷҷӯҳ зоҳир намуд. Ҳамзамон ҷонибҳо перомуни сафари қарибулвуқӯъи вазири маорифи ҷумҳурӣ ба Эрон табодули назар карданд.
