Душанбе. 8-уми январ. ОИ «Азия-Плюс» – Қарор аст, моҳи майи соли ҷорӣ дар доираи лоиҳаи таҷдиди соҳаи маориф, ки аз тарафи Бонки ҷаҳонӣ ва ҳукумати Тоҷикистон маблағгузорӣ мегардад, дар 105 муассисаи таълимии кишвар санҷиш гузаронида шавад.
Тавре ба ОИ «Азия-Плюс» аз Маркази татбиқи лоиҳаҳо дар соҳаи маориф хабар доданд, дар чаҳорчӯбаи ин лоиҳа, донишу малакаи муҳассилини синфҳои чаҳоруми макотиби миёна санҷида мешавад.
«Санҷишҳо дар 105 мактаби 12 шаҳру ноҳияҳое, ки ба шакли нави маблағгузорӣ гузаштаанд, гузаронида хохад шуд», – гуфт манбаъ ва афзуд, ки дар маҷмӯъ сатҳи дониши беш аз 2 ҳазору 300 муҳассил мавриди санҷиш қарор хоҳад гирифт.
