Душанбе. 3-юми июн. ОИ «Азия-Плюс» – Идораи СММ оид ба ҳамоҳангсозии масоили гуманитарӣ ба кишварҳову созмонҳои мададрасон бори дигар аз вазъи душвори Тоҷикистон ёдовар шуд. Дар гузориши маркази иттилооти СММ гуфта мешавад, бар асари боронҳои шадиди давомнок, обхезӣ ва фаромадани лойқаву ярч аз 58 ноҳияи кишвар сокинони 40 ноҳия осеб диданд.
Зикр мегардад, ки то ҳанӯз 12 ҳазор нафар осебдидагон ба кӯмаки таъҷилӣ ниёз доранд ва мушкилоти асосии сокинони иқоматгоҳҳои муваққатӣ дар хаймаҳо норасоии оби нӯшокӣ аст. «Агентиҳои гуманитарии дар Тоҷикистон фаъолиятдошта аз созмонҳову кишварҳои мададрасон даъват мекунанд, ки баҳри кӯмак ба Тоҷикистон 1,3 млн. доллари ИМА маблағ ҷудо созанд», – изҳор доштааст сухангӯи СММ Мишел Монтас.
Дар гузориш хотиррасон карда мешавад, ки СММ барои харидории хаймаҳои истиқоматӣ, маводи сӯзишворӣ ва дигар лавозимоти зарурӣ ба Тоҷикистон 120 ҳазор доллар маблағ ҷудо кард.
