Душанбе. 13-уми июл. ОИ «Азия-Плюс» – Тибқи иттилои дақиқи расида ба ОИ «Азия-Плюс» аз мақомоти ҳифзи ҳуқуқ, яке аз собиқ фармондеҳони Иттиҳоди нерӯҳои мухолифини тоҷик, собиқ вазири ВҲФ ва МГ ҶТ Мирзо Зиёев чанде пештар дар ноҳияи Тавилдара дар натиҷаи аз ҷониби ҳаммаслакони худ – гурӯҳи ҷиноятпешаи Неъмат Азизов ҳадафи тирпарронии шадид қарор гирифтанаш дар ҷойи ҳодиса ба ҳалокат расид.
Бино ба иттилои манбаъ, баъди ба ҳукуматдорон таслим шудани М.Зиёев, тасмим гирифта шуд, ки ӯро ба Душанбе интиқол медиҳанд, аммо тибқи нишондоди ӯ, зарур омад, дар ҷойи ҳодиса корҳои фаврии тафтишотӣ гузаронида шаванд. «Мирзо Зиёев макони нигаҳдории силоҳи оташфишонро нишон доданӣ шуда, аз ҷонибдорони ҳанӯз дар озодӣ қарордоштаи худ даъват ба амал оварданӣ буд, ки ба ҳукуматдорон таслим шаванд. Ба макони муайяншуда ҳозир гардида, Мирзо Зиёев ҳадафи тирпарронии шадиди ҳаммаслакони худ қарор гирифта, дар ҷойи ҳодиса ба ҳалокат расид», – гуфт манбаъ.
Зикр гардид, ки як зумра кормандони мқомоти қудратии ҷумҳурӣ низ ҷароҳат бардоштанд. «Ҳамин тариқ, ба шаҳри Душанбе танҳо якчанд тарафдорони Мирзо Зиёев оварда шуданд», – афзуд сарчашма.
