Душанбе. 5-уми август. ОИ «Азия-Плюс» – Дар нимсолаи авали соли ҷорӣ «Ширкати алюминийи тоҷик» (Талко) беш аз 185 ҳазор тонна алюминийи аввалия истеҳсол кард, ки нисбат ба ҳамин дапвраи соли гузашта 18,3 дарсад камтар аст.
Чӣ тавре ки ба ОИ «Азия-Плюс» аз Вазорати рушди иқтисод ва савдои ҶТ иттилоъ доданд, соли ҷорӣ ширкати мазкур истеҳсоли 377 ҳазор тонна алюминийро ба нақша гирифтааст. «Алюминий маҳсулоти асосии содиротии Тоҷикистон буда, коҳиши арзиши он дар бозори ҷаҳонӣ нисбат ба ҳамин давраи соли гузашта ба андозаи қариб 40 дарсад ба таври қобили мулоҳиза ба коҳиши ҳаҷми истеҳсоли маҳсулоти саноатӣ дар Тоҷикистон дар ин давра боис гардид», – гуфт манбаъ.
Бино ба иттилои манбаъ, дар бозори ҷаҳонӣ арзиши алюминий дар ҳамин давраи соли гузашта 3 ҳазор доллари ИМА барои 1 тоннаро ташкил медод, вале имрӯз арзиши як тоннаи он то 1820 $ поин рафтааст. «Коҳиши ҳаҷми алюминий ҳамчунин ба камбуди нерӯи барқ ва гази табиӣ низ вобста аст», – афзуд сарчашма.
