Душанбе, 13-уми май. «Азия-Плюс» — Дар наздикии мавзеи баргузории амалиёти махсуси чанде қабл зидди гурӯҳи Мулло Абдулло дар минтақаи шарқи ҷумҳурӣ як пинҳонгоҳи аслиҳа ошкор карда шуд.
Тавре аз Вазорати корҳои дохилии ҷумҳурӣ иттилоъ доданд, дирӯз, 12-уми майи соли ҷорӣ, кормандони милиса зимни азназаргузаронии деҳаи Шербегиёни ҷамоати Самсолиқи нохияи Нуробод ду автомати Калашникови қутрашон 7,62 мм-ро дарёфт кардаанд. «Худи ҳамон рӯз кормандони мақомоти ҳифзи ҳуқуқ дар Боғи Ғалабаи пойтахт таппончаи Макаровро дарёфт намуда, ҳамчунин сокини ноҳияи Ғончии вилояти Суғд ихтиёран яроқи шикории худро ба мақомот супоридааст», – гуфтанд дар вазорат.
Ба иттилои манбаъ, нигаҳдории аслиҳа дар дасти аҳолӣ ба ҳодисаҳои фоҷеабор боис мегардад ва яке аз чунин ҳодисаҳои рӯзи 11-уми майи соли ҷорӣ дар ноҳии Мастчоҳи вилояти Суғд рух дода, С. Ҳоҷиқурбони 28-сола аз таппончаи Макаров ба Ш.Сайфиддини 30-сола якчанд тир холӣ мекунад, ки ахирӣ бар асари ҷароҳатҳои вазнини бардошта дар беморхона ба ҳалокат мерасад.
Бино ба маълумоти мақомоти ҳифзи ҳуқуқи кишвар, соли равон дар Тоҷикистон 513 адад аслиҳаи оташфишон ва муҳимот – 122 автомат, 90 таппонча, 51 норинҷакафкан, 254 норинҷак ва дигар маводи тарканда дарёфт ва мусодира карда шудааст.
