Душанбе. 21-уми июн. «Азия-Плюс» — | Сафирони кишварҳои узви Итииҳоди Аврупо дар Тоҷикистон аз қазияи ҳабси хабарнигори Би-Би-Си дар шаҳри Хуҷанд ва хабарҳои муносибати бераҳомна дар нисбатӣ ӯ аз ҷониби мақомоти ҳифзи ҳуқуқи изҳори нигаронӣ карданд.
Дар изҳороти чанде қабл интишоргардидаи роҳбарони гурӯҳи кишварҳои узви Иттиҳоди Аврупо зикр мегардад, ки «мо ба хубӣ огаҳем, ки дар идомаи боздошт ба ӯ айби узвият дар созмони «Ҳизб-ут-таҳрир» пешниҳод шудааст». «Мо аз ҳукуматдорони Тоҷикистон даъват ба амал меоварем, ки даъвои муносибати бераҳмона нисбат ба ӯро мӯшикофона таҳқиқ намоянд ва аз он нигаронем, ки аз замони боздошти Усмонов нисбат ба ӯ тартиботи дахлдори додгоҳӣ мавриди истифода қарор нагирифтааст», – омадааст дар изҳорот.
Дар идомаи изҳорот гуфта мешавад, Иттиҳоди Аврупо рӯйи муҳим будани таъмини озодии ВАО дар Тоҷикистон таъкид дошта, дар ҳамин ҳол, кӯшишҳои ҳукумати Тоҷикистон ҷиҳати таъмини амният дар кишварро низ эътиоф месозад. «Иттиҳоди Аврупо чун қабл аз ҳукуматдорони Тоҷикистон даъват ба амал меоварад, ки меъёрҳои байнулмилалии шаффофи фаъолияти додгоҳиро мавриди истифода қарор диҳад», – зикр мегардад дар изҳорот.
Иттиҳоди Аврупо дар ҳайати худ 27 кишварро муттаҳид карда, аз бузургтарин имдодрасонҳои ҷаҳон аст. Шурӯъ аз соли 1992 Иттиҳоди Аврупо ба Тоҷикистон дар ҳаҷми умумии беш аз 500 млн. Евро кӯмаку мусоидат кардааст.
