Дар 8 ноҳияи минтақаи Кӯлоби вилояти Хатлон то ҳанӯз ҳудуди 150 маҳаллаи аҳолинишин ба низоми энергетикии ҷумҳурӣ васл карда нашудаанд.
Тавре ба ОИ «Азия-Плюс» директори шабакаҳои барқии минтақи Кӯлоби вилояти Хатлон Мирзо Исмоилов хабар дод, ин маҳаллаҳои аҳолинишин ахири асри 20 ва аввали асри 21 ҳангоми ба деҳаҳои авлодӣ баргаштани аҳолии ба водиҳо кӯчонидашуда бунёд ёфтаанд.
Ба гуфтаи вай, гузаронидани хатти интиқоли барқ ба ин деҳаҳо ба як қатор мушкилот мувоҷеҳ аст. «Дар аксари ин деҳаҳо 2-3 ва дар баъзе ҷойҳо 5-8 оила зиндагонӣ мекунанд ва рустоҳое мавҷуданд, ки ҳамагӣ 4 нафар иқомат доранд», – мегӯяд ӯ.
Исмоилов мегӯяд, ба ҳар як деҳа ба масофаи аз 6 то 11 километр хатти интиқоли барқ гузаронидан зарур аст. «Дар ҳамаи деҳаҳо насби трансофрматори алоҳида ва бунёди зеристгоҳ лозим меояд, ки хароҷоти молиявии зиёдро тақозо мекунад, вале дар ояндаи наздик рӯйпӯш шудани ин хароҷот маълум нест», – иброз дошт Исмоилов.
«Вале аз ин вазъ дар ширкати «Барқи тоҷик» фаромӯш намекунанд. Соли 2011 ҳудуди бист деҳаҳои ноҳияҳои Шӯроободу Балҷувон ба низоми энергетикии ҷумҳурӣ пайваст карда шуданд», – афзуд номбурда.
