Дар яке аз тарабхонаҳои шаҳри Маскав ба журналисти тоҷик Додоҷон Атовуллоев дарафтода, ӯро захмӣ намуданд.
Бино ба маълумоти расонаҳои хабарии Русия, ин ҳодиса миёни соатҳои 9 ва 10-и шаб дар тарабхонаи итолиёвии «Виаҷио» ба вуқӯъ пайвастааст. Ба ӯ шахси «симои осиёидошта» дарафтода, ду маротиба бо корд зарба задаст. Д.Атовуллоев дар ҳолати вазнин ба беморхонаи ба номи Склифосовский мунтақил гардидааст.
Бино ба шаҳодати табибон, ҷарроҳии аввал хуб гузашта, феълан ба ҳаёти Д.Атовуллоев чизе таҳдид намекунад.
Тибқи иттилои хабаргузории Интерфакс, ба ҷойи ҳодиса гурӯҳи фаврии муфаттишон ҳозир шуда, тафтишот оғоз шудааст.
Роҳбари ҳаракати мухолифи ҳукумати «Ватандор» Додоҷон Атовуллоеви 56-сола ҳамеша ҳукумат ва президенти Тоҷикистон Эмомалӣ Раҳмонро мавриди интиқод қарор медиҳад. Солҳои ахир ӯ дар Русияву Олмон зиндагӣ мекунад.
Соли 2011 Прокуратураи генералии Тоҷикистон бори навбатӣ нисбат ба ӯ парвандаи ҷиноӣ боз намуда, аз Русия тақозо кард, ки Д.Атовулооев ба ватан истирдод гардад, вале ин дархост низ чун дархостҳои пешина аз ҷониби Русия қонеъ нагардид.
