Дар низоми интиқоли шабакаҳои барқи шаҳри Қӯрғонтеппа бар асари сармои шадид ва афзудани шиддатнокӣ тез-тез садамаҳо рух медиҳанд.
Тавре ба ОИ «Азия-Плюс» директори корхонаи шабакаҳои барқи шаҳри Қӯрғонтеппа Исомиддин Сафаров хабар дод, дар муддати ду рӯзи ахир ду трансформатор аз кор баромада, дар якчанд хатҳои интиқоли барқ садамаҳо ба вуқӯъ пайвастаанд.
«Мо ба чунин вазъ қаблан омодагӣ гирифта будем. Айни замон тамоми хадамоти шабакаҳои барқи шаҳр шабонарӯзӣ фаъолият дошта, кӯшиш дорем, ки тамоми садамаҳоро дар муддати кӯтоҳтарин бартараф намоем», – гуфт вай.
Ӯ ҳамчунин зикр кард, ки чун феълан дар шаҳр маркази барқу гармидиҳӣ ва газ мавҷуд нест, тамоми шиддат ба дӯши шабакаҳои барқ рост меояд. «Дар манзилҳои зисти баландошёна гармкунии хонаҳо ва кори пойгоҳҳои обкашӣ аз ҳисоби қувваи барқ сурат мегиранд», – идома дод Сафаров.
Номбурда ҳамчунин зикр кард, ки дар як шабонарӯз барои шаҳри Қӯрғонтеппа интиқоли 800 ҳазор кВт/соат нерӯи барқ пешбинӣ шудааст, вале воқеан истеъмолгарон бо зиёда аз 1 млн. кВт/соат нерӯи барқ таъмин карда мешаванд. «Фасли гармо талаботи аҳолӣ ба нерӯи барқ то 400 ҳазор кВт/соат ё худ ба андозаи 50% коҳиш меёбад», – афзуд ӯ.
