Донишгоҳи давлатии Хуҷанд шояд пурра аз қабули имтиҳон ва санҷишҳо аз донишҷӯён зимни таҳсил даст кашида, ба шакли ба истилоҳ таҳсили «кредитӣ» гузарад.
Зимни шарҳи ин масъала ба ОИ «Азия-Плюс» мудири кафедраи методикаи таълими забонҳои хориҷии донишгоҳ Алиҷон Бойматов изҳор кард, ки айни замон дар донишгоҳ ба ҷуз чор факулта дигар ҳамаи факултаҳо ба ин тарзи таҳсил гузаштаанд ва ояндаи наздик масъалаи ба ин шакли таҳсил гузаштани чор факултаи зикршуда низ ҳал мешавад.
«Дар шакли нави таҳсил балл ва соатҳое, ки дар он донишҷӯ ба дарс омада, мустақилона кор мекунад, ба ҳисоб гирифта мешаванд, – мегӯяд Бойматов. – Ҳамчунин воҳиди махсуси санҷиш низ вуҷуд дорад. Дар он як «кредит» ба 16 соате, ки барои омӯзиши фан ҷудо мегардад, баробар буда, донишҷӯ ҳар қадар ба ин кредитҳо соҳиб шавад, ҳамон қадар хубтар аст».
Мудири кафедраи донишгоҳ зикр кард, ки рӯзҳои 27-31-уми март махсус барои табодули таҷриба ва расонидани ёрии методӣ ба ДДХ мутахассисони олмониву эстонӣ омада буданд. Онҳо дар кори семинар-конфронс дар доираи лоиҳаи «ТЕМПУС», ки баҳри ҷорӣ сохтани шакли нави таҳсил дар саросари ҷаҳон талош меварзад иштирок карданд.
Дар лоиҳаи мазкур донишгоҳҳои шаҳрҳои Тарту (Эстония) ва Дрезден (Олмон) ва аз Тоҷикистон Донишгоҳҳои давлатии Хоруғ, Кӯлоб ва Хуҷанд иштирок доранд.
Бино ба маълумоти як манбаъ аз ректорати донишгоҳ, айни замон дар шӯъбаи рӯзонаи ДДХ 7822 нафар (3222 нафар тибқи қарордод) ва дар шӯъбаи ғоибона 4704 нафар (2948 тибқи қарордод) донишҷӯён таҳсил мекунанд. Дар 17 факултаи донишгоҳ 74 номгӯйи мутахассисон омода мегарданд. Шумори омӯзгорони донишгоҳ 827 нафарро ташкил дода, боз беш аз 100 нафар омӯзгорон бо донишгоҳ ҳамкорӣ доранд.
