Дар шаҳри Ваҳдат куштори бераҳмонаи як зани 22-сола содир гардид.
Тавре аз маркази матбуоти ВАзорати корҳои дохилии ҷумҳурӣ хабар доданд, шаҳрвандон Самадов Зафари 28-сола, истиқоматкунандаи кӯчаи Темур Собир, Абдуллоев Исматуллои 25-сола, сокини кӯчаи Рӯдакӣ ва Саъдуллоев Дилшоди 26-сола, истиқоматкунандаи кӯчаи Мирзо Ризои шаҳри Ваҳдат дар содир намудани ҷинояти вазнин гумонбар дониста шудаанд. Ҳафтаи сипаришудаи соли равон шомгоҳ баъди нӯшидани машруботи «пиво» ва истеъмоли маводи мухаддир, дар қалбашон иштиёқи муносибатҳои маҳрамона бедор гардида, дар назди беморхонаи Марказии шаҳри Ваҳдат бо шаҳрванд Умронова Робия соли таваллудаш 1991, истиқоматкунандаи кӯчаи Ватани шаҳри Ваҳдат вомехӯранд. Баъди бо ӯ шинос шудан ӯро ба самти Арбобдараи ноҳия мебаранд.
Ин тоифаи аз истеъмоли машрубот сархушу аз маводи мухаддир ақлгумкарда, баъди анҷом додани кирдори зишту бадахлоқона ва амали фосиқона бо шаҳрванд Умронова Р. ба самти ноҳия ҳаракат мекунанд. Дар роҳи деҳаи Чиртак ҷабрдида аз ин кирдори зишти онҳо дар ғазаб шуда, изҳор менамояд, ки ба кормандони милитсия муроҷиат мекунад. Ҷавонони сархушу сармаст аз ин суханони ҷабрдида дар қаҳру ғазаб шуда, автомашинаро дар канори роҳ манъ карда, номбурдаро бо як бераҳмии махсус бо корд дар ҳудуди дилаш ва гарданаш мезананд, ки ӯ аз бардоштани ҷароҳати сахти ҷисмонӣ дар ҷои ҳодиса ба ҳалокат марасад. Айни замон ин гумонбаршудагон дар ҳабси пешакӣ қарор доранд ва нисбаташон аз тарафи Прократураи шаҳри Ваҳдат парвандаи ҷиноӣ оғоз шудааст.
