Нозири 30-солаи Бозрасии давлатии автомобилӣ Хуршедҷон Абдураҳмонов аз дасти як нашъаманд захмӣ шуд.
Тавре аз Вазорати корҳои дохилии ҷумҳурӣ хабар доданд, рӯзи шанбеи ҳафтаи сипаришуда тахминан соати 15.30 дақиқа ӯ дар кӯчаи Ҷомӣ ҳангоми адои хизмат ронандаи автомашинаи тамғаи «Мерседес-Бенс» шаҳрванд Мансурҷон Абдуллоеви 35-соларо барои азназаргузаронии ҳуҷҷатҳои ронандагиаш боздошт намудааст.
«Бо дидани вазъи боздоштшуда ӯ қарор медиҳад, ки ронандаро барои муоина ба беморхонаи наркологӣ фиристад, вале дар дохили автомашина Абдуллоев нозирро латукӯб намуда, бо корд дасти чапашро зада захмӣ мекунад ва аз ҷойи ҳодиса ғайб мезанад», – гуфтанд дар вазорат.
Баъди чанде Абдуллоев боздошт шуда, пас ташхис дар беморхонаи наркологӣ муайян карда шудааст, ки ӯ дар вақти боздошт аз истеъмол намудани маводи нашъадори «чакида» дар ҳолати мадҳушӣ қарор доштааст. Аз рӯйи ин далел парвандаи ҷиноӣ боз шуда, корҳои тафтишотӣ идома доранд.
