Кормандони Кумитаи давлатии амнияти миллӣ як гурӯҳи ҷиноиеро безарар гардониданд, ки муддати беш аз 20 сол ба омода кардан ва фурӯши дипломҳои макотиби олии Тоҷикистон машғул будааст.
Тавре ба ОИ «Азия-Плюс» сардори Маркази робита бо ҷомеаи КДАМ ҶТ Нозирҷон Бӯриев хабар дод, аъзои гурӯҳ – сокинони пойтахт Сафар Раҷабови 63-сола, Ғиёсиддин Очилови 46-сола, Людмила Дрозденкои 44-сола, Муҳаббат Сувонқуловаи 39-сола ва сокини 39-солаи шаҳри Турсунзода Толиб Очилдиев сар аз охири соли 1990 то замони дастгир шудан ба шаҳрвандони Русия, Эрон, Афғонистон, Ӯзбекистон ва Тоҷикистон бо арзиши аз 300 то 800 доллари ИМА беш аз 100 адад дипломҳои макотиби олии Тоҷикистонро фурӯхтаанд.
Ба иттилои манбаъ, зимни боздошти аъзои гурӯҳи ҷиноятпешаи созмонёфта далелҳои шайъӣ – техникаи компютерӣ, принтерҳои ранга, варақаҳои нимтайёр ва тайёри муқоваи дипломҳои қалбакӣ дарёфт ва мусодира карда шудаанд.
Зикр гардид, ки нисбат ба аъмоли ин шахсон парвандаи ҷиноӣ боз шуда, тафтишот идома дорад.
