Соли оянда Ҳизби наҳзати исломии Тоҷикистон 40-умин солгарди таъсисёбиашро ҷашн гирифтанист.
Тавре ба ОИ «Азия-Плюс» муовини раиси ҲНИТ Муҳаммадалии Ҳайит хабар дод, чорабиниҳои ҷашнӣ моҳи апрели соли 2013 доир мегарданд.
«Рӯйхати чорабиниҳои ҷашниро то ахири соли равон Шӯрои сиёсии ҲНИТ тасдиқ хоҳад кард», – гуфт ӯ.
Ёдрас мекунем, ки 20-уми апрели соли 1973 бо ташаббуси марҳум Сайид Абдулло Нурӣ ба таври пинҳонӣ Наҳзати ҷавонони исломихоҳи Тоҷикистон таъсис дода шуд, ки ба ҳайати муассисони он ҳамчунин Қорӣ Муҳаммадҷон, Эшони Неъматулло, Ҳоҷӣ Қаландар ва Халиди Абдусалом низ шомил буданд.
Пас аз ба соҳибистиқлолӣ расидани Тоҷикистон дар заминаи иттиҳоди мазкур Ҳизби наҳзати исломии Тоҷикистон таъсис ёфт. ҲНИТ баҳори соли 1992 расман сабти ном шуда, сарварии онро Муҳаммадшариф Ҳимматзода ба дӯш гирифт.
Соли 1993 фаъолияти ҲНИТ боздошта шуда, моҳи августи соли 1999 дар чаҳорчӯби татбиқи Созишномаи умумии истиқрори сулҳ ва ризояти миллӣ, ки 27-уми июн дар Маскав ба имзо расид, ҲНИТ дубора ба қайд гирифта шуда, ба фаъолияти худ дар қаламрави ҷумҳурӣ идома дод.
Айни замон шумори аъзои Ҳизби наҳзати исломии Тоҷикистон 50 ҳазор нафарро ташкил медиҳад. Дар палатаи поёнии парлумони ҷумҳурӣ тибқи рӯйхати ҳизбӣ ду нафар аъзои ҲНИТ вакил интихоб шудаанд.
