Охири ҳафтаи гузашта бо ташаббуси намояндагии Иттиҳоди Аврупо дар Тоҷикистон вохӯрии Муҳиддин Кабирӣ, роҳбари Ҳизби наҳзати исломии Тоҷикистон бо сафирон ва намояндагони сафоратҳои Аврупо дар кишварамон баргузор гашт.
Бино ба маълумоти сомонаи расмии ҲНИТ, сафирони аврупоӣ ҳадаф аз ин вохӯриро шиносоии бештар ба вазъи минтақа ва кишвар, бахусус, дар пасманзари ҳодисаҳои Бадахшон унвон карданд. Инчунин, огоҳӣ аз мавқеъи ҲНИТ ва ба роҳбарияти он расонидани мавқеъи кишварҳои аврупоӣ аз ҳадафҳои аслии ин дидор гуфта шуд.
Роҳбари ҲНИТ вазъи кишвар, ба хусус, Бадахшонро душвор, вале рӯ ба эътидол номида, изҳор кард, ки ворид намудани нирӯи зиёд ва он ҳам артиш, печидагиҳои сиёсӣ ва ҳуқуқиро ба миён овард ва боиси ташаннуҷи бештари вазъ гашт.
М.Кабирӣ гуфт, ҲНИТ ҷонибдори волоияти қонун дар саросари кишвар мебошад, «вале волоияти қонунро мебояд танҳо бо василаҳои қонунӣ ва мантиқӣ таъмин кард, амалҳои берун аз чорчуби қонун натиҷаҳои баръакс хоҳад дод».
«Нерӯ танҳо он вақт бояд истифода шавад, ки василаҳои дигар, мисли муколама ва ҳамдигарфаҳмӣ натиҷа надода бошанд. Дар он сурат ҳам, истифодаи нерӯ бояд мутавозин бо қазия бошад, на бештар аз он», – муътақид аст раиси ҲНИТ.
Ба андешаи ӯ, камбуди шафофият дар тасмимҳо ва раванди ҳодисаҳо боиси зери суол рафтани дурустии амалҳо гашта, боиси дар ҷомеа пайдо шудани сарусадоҳо ва овозаҳо гуногун гардидааст».
«Ба таври ваҳшиёна куштани раиси шӯъбаи вилоятии ҲНИТ дар Бадахшон, Сабзалӣ Мамадризоев моро хеле нигарон кардааст ва мо интизори натиҷаҳои тафтишот дар қазияи куштори Мамадризоев хоҳем монд», – афзуд М. Кабирӣ.
