Шабонарӯзи гузашта бар асари чор садамаи нақлиёт шаш нафар шаҳрвандони Тоҷикистон ҷони худро аз даст доданд.
Бино ба маълумоти Вазорати корҳои дохилии ҷумҳурӣ, дар қаламрави шаҳри Қайроққуми вилояти Суғд Ҷовид Маҳмадҷонови 28-сола аз уҳдаи идораи воситаи нақлиёт набаромада, он ба дарахти канори роҳ бармехӯрад. Дар натиҷа ронанда ва ду мусофири автомашина – Бибиҳанифа Маҳмадҷоноваи 55-сола ва Насиба Ҷамолиддиноваи 5-сола ба ҳалокат расиданд. Ду тан мусофири дигар бо ҷароҳатҳои гуногун дар бемористон бистарӣ шуданд.
Ҳодисаи дигар дар роҳи мошингарди Данғара-Қӯрғонтеппа ба вуқӯъ пайваст. Ронандаи автомашинаи тамғаи «Нексия» Ҷумъахон Шарифови 27-сола ба самти муқобили ҳаракат баромада, ба автомашинаи тамғаи «Опел-Астра» тахти идораи Муҳаббат Холматови 61-сола бармехӯрад. Дар натиҷаи ин садама як зан фавтидааст, ки шахсияташ ҳанӯз маълум нест. Ронандагон ва як мусофири дигар дар беморхона бистарӣ шуданд.
Боз як ҳодисаи садамаи нақлиёт дар Ваҳдат рух дод. Автомашинаи тамғаи «Опел-Астра» таҳти идораи сокини 31-солаи ноҳияи Файзобод Абдурозиқ Неъматов роҳгузар Олга Брединаи 54-соларо пахш мекунанд, ки бар асари он зан дар ҷойи ҳодиса ба ҳалокат расидааст. Ҳамчунин дар Ваҳдат ронандаи автомашинаи «КАМАЗ-5511», сокини 21-солаи ноҳияи Ваҳдат Бахтовар Солеҳов аз уҳдаи идораи воситаи нақлиёт набаромада, автомашинаи боркаши бузургҳаҷм чаппа мешавад. Ронанда дар ҷойи ҳодиса ба ҳалокат расидааст.
