Натиҷаи ташхиси ҷароҳатҳо дар ҷисми маҳкумшуда Ҳамза Икромзода, ки аз ҷониби Маркази тибби судии назди Вазорати тандурустии ҶТ гузаронида шуданд, далели истифодаи шиканҷа нисбати ӯро собит насохтанд.
Коршиносон ба хулоса расиданд, ки маҳкумшуда бар асари худро ба дор овехтан фавтидааст.
Тавре ба ОИ «Азия-Плюс» наздикони Ҳ.Икромзода хабар доданд, онҳо бо натиҷаи ташхиси мазкур қаонатманд набуда, аз Прокуратураи генералӣ баргузор намудани ташхиси такрориро талаб хоҳанд кард.
Ҳимоятгари ҷониби ҷабрдида Гулчеҳра Холматова аз ҳама гуна шарҳи ин масъала худдорӣ варзида, таъкид намуд, ки дар давоми баргузории тафтишот прокуратура аз ӯ дар бораи ифшо накардани хулосаи коршиносони ташхиси судиву тиббӣ забонхат гирифтааст.
Маҳкумшуда Ҳамза Икромзода рӯзи 20-уми сентябри соли равон дар муассисаи ислоҳии №1-и шаҳри Душанбе ба ҳалокат расид. Наздикони ӯ мегӯянд, дар ҷисми ӯ осори возеҳи лату кӯб ва истифодаи шиканҷа аён буданд.
Тибқи фарзияи расмӣ, Ҳ.Икромзода дар ҳуҷраи зиндон ба дор овехташуда дарёфт гардида, кормандони муассиса кӯшиш кардаанд, ки ба ӯ ёрии тиббӣ расонанд, вале аллакай дер шуда буд.
Прокуратура оид ба назорати иҷрои қонунҳо дар муассисаҳои ислоҳӣ аз рӯи далели марги маҳкумшуда мутобиқи моддаи 322-и КҶ ҶТ (Хунукназарӣ) парвандаи ҷиноӣ боз намуд. Айни замон оид ба ин ҳодиса тафтишот идома дошта, сабабҳои марги Ҳ.Икромзода мавриди таҳқиқ қарор гирифтаанд.
Ёдрас мекунем, ки Ваколатдор оид ба ҳуқуқи инсони Тоҷикистон аз ин ҳодиса изҳори нигаронӣ намуда, аз Прокуратураи генералӣ дархост кард, ки аз рӯи далели марги маҳкумшуда тафтишоти беғаразона ва мунсифона гузаронида шавад.
