Нимаи дуюми имрӯз президенти кишвар Эмомалӣ Раҳмон ноиби директори минтақавии Барномаи рушди Созмони Милали Муттаҳид оид ба масъалаҳои Аврупои Шарқӣ, Осиёи Марказӣ ва Иттиҳоди Давлатҳои Мустақил (ИДМ) Ҷаҳан Султаноглуро ба ҳузур пазируфт.
Бино ба маълумоти хадамоти матбуоти сарвари давлат, дар мулоқот масоили ҳамкории Тоҷикистон бо Созмони Милали Муттаҳид, қабл аз ҳама бо Барномаи рушди он, баррасӣ шуд.
Ба иттилои манбаъ, таваҷҷуҳи асосӣ ба татбиқи босамари чорабиниҳои бахшида ба Соли байналмилалии ҳамкорӣ дар соҳаи об ва иқдоми ҷаҳонии «Энергияи устувор барои ҳама» зоҳир гардид.
Бо таваҷҷуҳи хоса ба масоили омодагӣ ба Конфронси байналмилалӣ доир ба об, ки таҳти васоёи СММ моҳи августи соли оянда дар шаҳри Душанбе баргузор мегардад, изҳори боварӣ карда шуд, ки ин чорабинии муҳим ба ҳалли мушкилоти глобалӣ дар ин соҳа такони ҷиддӣ мебахшад.
Дар мулоқот ҳамчунин доир ба дигар масоили мавриди таваҷҷуҳ гуфтугӯ сурат гирифт.
