Зимни мусоҳиба бо хабарнигорон раиси Шӯрои адлияи ҶТ Зафар Азизов изҳор намуд, ки дар Тоҷикистон ва собиқ кишварҳои шӯравӣ масъалаи истифодаи шиканҷа мушкилоти доғи рӯз аст, аммо эътироф бояд кард, ки ҷиҳати аз байн бурдани он аз ҷониби давлат тадбирҳо андешида мешаванд.
Ӯ хотиррасон намуд, ки моҳи апрели соли гузашта ба Кодекси ҷиноии ҶТ моддаи нави «Шиканҷа» ворид гардида, аллакай ду нафар кормандони мақомоти ҳифзи ҳуқуқ мувофиқи он маҳкум шуданд.
«Ин ҳодисаҳо аксаран дар марҳилаи барвақти боздошт ё марҳилаи оғози парвандаи ҷиноӣ ба вуқӯъ пайваста, ҷабрдидагон на ҳамеша саривақт аз шиканҷа хабар медиҳанд, ки ин ба исботи далелҳо дар мурофиаи судӣ мушкил эҷод месоазд», – иброз дошт вай.
Ба андешаи номбурда, агар дар суд далели истифодаи шиканҷа исбот шавад, ҳатман мувофиқи он қарори дахлдор қабул мегардад. «Парвандаҳои ҷиноӣ оид ба шиканҷаи аз ҷониби судҳои шаҳри Душанбе баррасишуда ба тафтишоти дубора баргардонида шуданд, зеро суд аз хулосаи мақомоти тафтишоти пешакӣ нисбати айбдоршавандагон қаноатманд набуд», – зикр кард Азизов.
Раиси Шӯрои адлияи ҶТ таъкид кард, ки айни замон аз ҷониби коршиносони миллӣ ва байнулмилалӣ масъала ба миён гузошта мешавад, ки дар судҳо нисбат ба шикоят оид ба шиканҷа чораҳои муассир андешида шаванд.
