Дар минтақаи ҷануби ҷумҳурӣ миқдори ниҳоят зиёди маводи мухаддир мусодира гардид.
Бино ба иттилои Вазорати корҳои дохилии ҷумҳурӣ, дар ҷараёни баргузории амалиёти махсуси кормандони Раёсати мубориза бо муомилоти ғайриқонунии маводи нашъаовари вилояти Хатлон дар ноҳияи Шӯрообод сокини 58-солаи маҳаллӣ Содиқ Исматов боздошт шудааст.
«Ҳангоми кофтукови шахсии боздоштшуда 5 адад бастаи дорои 54 килову 200 грамм маводи мухаддири навъи бангдона дарёфт ва мусодира карда шуд», – хабар медиҳад ВКД.
Ба иттилои манбаъ, ҳамчунин аз ҷониби кормандони милитсия дар ноҳияи Фархор ҳамчун гумонбар дар муомилоти ғайриқонунии маводи мухаддир шаҳрванд Ёров Аюбҷон Ҳабибуллоевич соли таваллудаш 1979, сокини деҳаи Дарқади ноҳияи Фархор, дастгир карда шудааст, ки дар вақти кофтукови шахсӣ аз борхалтаи ӯ 4 килою 960 грамм маводи нашъадори «ҳашиш» ва 4 килою 90 грамм маводи нашъадори «афюн» (ҷамъ 9 килою 50 грамм) дарёфт ва мусодира карда шудааст.
Зимнан зикр мегардад, ки аз рӯи ин ҳодисаҳо парвандаи ҷиноӣ оғоз гардида, тафтиш идома дорад.
