Бар асари сӯхтор дар яке аз хонаҳои истиқоматии шаҳри Екатеринбурги Русия се нафар муҳоҷири тоҷик ба ҳалокат расиданд.
Сафорати Тоҷикистон дар Русия бо истинод ба маълумоти Консулгарии сафорат дар шаҳри Екатеринбург ин хабарро таъйид намуда, иттилоъ медиҳад, ки шаби 22-юми майи соли равон дар натиҷаи бо ҳам печидани ноқилҳои барқӣ дар боми ин хонаи истиқоматӣ сӯхтор сар зада, дар натиҷа се нафар муҳоҷири меҳнатии тоҷик ҳалок ва 6 нафари дигар бо ҷароҳатҳои гуногун ба бемористонҳои мухталифи шаҳр интиқол ёфтаанд. «Ҳувияти ҳамаи онҳо муайян гардидааст, эшон ҳамагӣ сокинони деҳаи Томини ноҳияи Айнии вилояти Суғд мебошанд», – зикр мегардад дар иттилои сафорат.
Ба қавли намояндаи расмии сафорати Тоҷикистон дар Русия Муҳаммад Эгамзод, феълан аз болои ин ҳодисаи нохуш Кумитаи тафтишотии ш. Екатеринбург парвандаи ҷиноӣ кушодааст. «Парвиз Асоев, консули генералии Тоҷикистон дар ш.Екатеринбург ин қазияро пурра зери назорати шахсии худ қарор додааст ва рӯзҳои наздик, баъди ба поён расидани тафтишот, ҷасади се тан аз муҳоҷирони тоҷик ба Ватан фиристода хоҳад шуд», – гуфт М.Эгамзод.
Зимнан зикр гардид, ки кормандони консулгарӣ аз ҳолу аҳволи 6 тани дигар, ки дар бемористон бистариянд, огоҳанд ва вазъи саломатии ду нафар нигаронкунандаву чор нафари дигар нисбатан хубтар аст.
