Сармушовири президент Содиқ Шоназаров дар бораи андешидани чора нисбати афроде, ки қаблан ба поймолкунии ҳуқуқи
саҳҳомони ширкати «Мовароуннаҳр
даст задаанд, ба намояндагони ширкат ва саҳҳомони он чизе ваъда надодааст.
Тавре ба ОИ «Азия-Плюс» худи Шоназаров дар ин робита иттилоъ дод, ӯ хеле дар тааҷҷуб аст, ки намояндагони ширкат дар ВАО чунин маълумоти носаҳеҳро интишор мекунанд.
«Рӯзи 27-уми май ман бо намояндаи ваколатдори саҳҳомони ҶДММ «Мовароуннаҳр» Бузургмеҳр Ёров суҳбати телефонӣ доштам ва ҳангоме ки ӯ дар бораи ба мо расидани мактуби саҳҳомони ширкат пурсид, мо посух додем, ки он дастраси мо шуда, ҳатман бо матни он шинос хоҳем шуд. Ман чизи дигаре ба онҳо на гуфтааму на чизе ваъда додаам», – иброз дошт Шоназаров.
Аммо Бузургмеҳр Ёров мегӯяд, рӯзи 27-уми май зимни суҳбати телефонӣ сармушовири президент Содиқ Шоназаров ваъда додааст, ки то санаи 30-юми май нисбати афроде, ки ба поймолкунии ҳуқуқи беш аз 600 нафар саҳҳомони ширкат даст задаанд, чора хоҳад андешид.
