Як ҳайати мутахассисони Кумитаи андози назди ҳукумати ҶТ таҳти роҳбарии муовини аввали раиси Кумита Аюб Солиев ҷиҳати омӯзиши таҷрибаи кории ҳамтоҳои итолиёвӣ ва канадагии худ ба шаҳрҳои Рим ва Монреал сафарбар шуданд.
Бино ба маълумоти хадамоти матбуоти Кумитаи мазкур, Кумитаи андоз дар робита бо корҳои рӯзмарра ҳамчунин ба фаъолияти беруна низ таваҷҷуҳ намуда истодааст, инчунин, ба масоили ташкили мубодилаи маълумот бо мақомоти ваколатдори мамлакатҳои хориҷӣ, ҳамоҳангсозии фаъолияти мақомоти андоз марбут ба омӯзиш, таҳлил ва андешидани чораҳо оид ба татбиқи муассири таҷрибаи байналмилалӣ дар самти маъмурикунонии андоз, инчунин таъмини қонунгузории андоз диққати ҷиддӣ медиҳад.
«Мақсад аз иқдоми мазкур омӯзиши масъалаҳои гузаронидани санҷишҳо аз рӯи баҳодиҳии хавфҳо, маъмурикунонии тартиби пардохти андоз аз арзиши иловашуда ва рушди маъмурикунонии андози субъектҳои сохибкории хурд ва миёна аст», – зикр мегардад дар иттилои Кумита.
Ёдрас мекунем, ки ахири соли гузашта Бонки ҷаҳонӣ барои амалисозии лоиҳаи ислоҳоти низоми андозбандии маъмурии Тоҷикистон 18 млн. доллари ИМА маблағ ҷудо карда, аввали моҳи феврали соли равон дар ҳамдастӣ бо ҳукумати ҶТ ва як қатор ниҳодҳои байнулмилалии молиявӣ ба татбиқи лоиҳаи мазкур оғоз намуд, ки ба итмом расонидани он ахири соли 2017 дар назар аст.
