Шоми рӯзи якшанбе дар ноҳияи Файзобод посбони филиали яке аз бонкҳои калонтарини мамлакат кушта шуд.
Тавре ба ОИ «Азия-Плюс» сокинони манзилҳои минтақаи атрофи бинои бонк хабар доданд, дар натиҷаи ҳамлаи ашхоси номаълум шоми рӯзи 7-уми июл посбони филиали ҶСК «Агроинвестбонк» дар ноҳияи Файзобод ба қатл расонида шуд.
Ҷинояткорон яроқи посбони бонкро бо худ гирифта, аз чойи ҳодиса фирор карданд. Ба гуфтаи шоҳидон, тамоми шаб маркази ноҳияи Файзобод таҳти назорати шадиди кормандони мақомоти милитсия қарор дошт.
Манобеи Вазорати корҳои дохилии Тоҷикистон ин хабарро рад накарда, таъкид сохтанд, ки оид ба ин ҳодиса дар фурсати наздиктарин маълумоти расмӣ интишор мешавад.
Айни замон мушаххас нест, ки ба ҳамлагарон рабудани маблағи бонк муяссар шудааст ё на. Дар хусуси дар кадом самт фаъолият бурдани мақомоти ҳифзи ҳуқуқ низ оид ба ин ҳодиса хабаре дар даст нест.
