Фазлиддин Худойбердиев вакили мудофеи рӯзноманигор Маҳмадюсуф Исмоилов ба ОИ«Азия-Плюс» хабар дод, ки зерҳимояи ӯ аз рӯйи ду моддаи Кодекси ҷиноятии Ҷумҳурии Тоҷикистон гумонбар дониста мешавад.
Ба қавли адвокат, вай бо зерҳимояаш рӯзи панҷшанбеи гузашта дар тавқифгоҳи тафтишотии № 2- и шаҳри Хуҷанд дидор кардааст. Исмоилов ҳанӯз 29-уми июн ба тавқифгоҳи тафтишотии мазкур интиқол ёфт ва то анҷом ёфтани тафтишот дар он ҷо хоҳад буд.
Вакили мудофеъ хабар дод, ки мақомоти тафтишотӣ рӯзноманигорро аз рӯйи ду моддаи Кодекси ҷиноятии ҶТ: 247 қисми 2 «тақаллубкорӣ» ва 250 қисми 2 «тамаъҷӯӣ» гумонбар медонанд. Қаблан ӯ аз рӯйи қисми 1-и моддаи 250 гумонбар дониста мешуд.
Ҳамчунин, ба қавли Худойбердиев, додгоҳи вилоятӣ аризаи шикоятии вакили мудофеъ дар бораи тағйири чораҳои эҳтиётии ҷазоро рад кард ва акнун зерҳимояи ӯ дар давоми тафтишот таҳти ҳабс нигоҳ дошта хоҳад шуд.
Ёдрас мекунем, ки тибқи иттилоъи паҳннамудаи ВКД-ии Тоҷикистон, 24-уми июн ба ШВКД дар ноҳияи Ашт сокини ҳамин ноҳия Аҳадова Санавбар муроҷиат кардааст, ки 21-уми июн дар ҳудуди шаҳраки Шайдон, шаҳрванд Исмоилов Маҳмадюсуф аз ӯ бо таҳдиди ифшои маълумоти бадномкунанда бо роҳи тамаъҷӯӣ 100-сомонӣ гирифтааст.
«Сипас, такроран рӯзи 24-уми июн Исмоилов М., барои нашр накардани ин маълумот бо роҳи тамаъҷӯӣ 100 доллари амрикоӣ талаб кардааст»,- оварда шудааст дар сомонаи ВКД.
Ҳамчунин гуфта мешавад, Исмоилов М., зимни гузаронидани чорабиниҳои оперативӣ-ҷустуҷӯӣ аз ҷониби кормандони ШВКД дар ноҳияи Ашт баъди гирифтани 400-сомонӣ аз Аҳадова бод алели шайъӣ дастгир карда шуд.
Аз рӯйи ин ҳолат мутобиқи моддаи 250, қисми 1 КҶ ҶТ парванди ҷиноӣ оғоз гардида, тафтиш идома дорад.
Ёдрас мекунем, ки аз моҳи ноябри соли 2010 Маҳмадюсуф Исмоилов муддати 11 моҳ аз ҷониби мақомоти ҳифзи ҳуқуқ таҳти ҳабси пешакӣ қарор гирифта буд. Ӯ дар содир кардани ҷиноятҳо мутобиқи моддаҳои 135 (Тӯҳмат), 136 (Таҳқир), 189, қ. 2 (Барангехтани кинаю адовати миллӣ, нажодӣ, маҳалгароӣ ва ё динӣ) ва 250 (Тамаъҷӯӣ) гумонбар дониста шуда буд.
Моҳи октябри ҳамон сол дар бинои тавқифгоҳи муваққатии № 2-и шаҳри Хуҷанд мурофиаи судӣ баргузор шуда, бо қарори суд журналист аз рӯйи тамоми моддаҳои дар боло зикршуда гунаҳкор дониста шуд. Суд ба ӯ дар ҳаҷми 50 ҳазору 500 сомонӣ ҷарима баст, аммо бо назардошти муддати 11 моҳ дар ҳабс қарор доштани ӯ, ҳаҷми ҷарима ба миқдори 17 ҳазору 500 сомонӣ кам гардида, 33 ҳазор сомониро ташкил дода буд. Ҳамчунин ӯ аз ҳуқуқи машғул шудан бо фаъолияти рӯзноманигорӣ ба муддати 3 сол маҳрум гардида, аз толори суд озод шуда буд.
