Созишнома миёни Тоҷикистон ва Корея дар бораи канорагирӣ аз андозбандии дукарата ва саркашӣ аз пардохти андоз аз даромад имрӯз дар Душанбе ба имзо расид. Зери созишнома вазири молияи Тоҷикистон Сафаралӣ Наҷмиддинов ва сафири Корея дар Тоҷикистон Ён Ҷон-Гу имзо гузоштанд.
Ҷонибҳо зикр карданд, ки Созишнома ба риояи қонунгузорӣ дар бахши андозбандӣ кафолат дода, тартиби баррасии муроҷиату аризаҳои андозсупорандагонро танзим ва ҳамчунин масоили табодули маълумот миёни мақомоти салоҳиятдори кишварҳоро ҳаллу фасл менамояд ва методҳои бартараф сохтани андозбандии дукаратаро муайян мекунад.
Ба гуфтаи вазири молияи Тоҷикистон Сафаралӣ Наҷмиддинов, имзои созишнома имкон медиҳад, ки муносибатҳои ҳамкорӣ ба сатҳи нав бароварда шаванд. «Мо ҳамчунин созишномаҳои нави ҳамкорӣ, аз ҷумла дар бахшҳои иқтисоду тиҷорат, илму техника ва ҳавопаймоиро низ баррасӣ дошта, ҳамчунин роҳандозии ҳамкориҳо дар соҳаи кишоварзӣ, коркарди маҳсулоти кишоварзӣ ва содироти он ба Корея имконпазир ва Тоҷикистон низ ба рушди ҳамкориҳои технологӣ бо Корея манфиатдор аст», – гуфт вазир.
Наҷмиддинов зикр кард, ки ҷониби Корея ба роҳандозиву рушди ҳамкориҳои дуҷониба дар бахшҳои истихроҷӣ кӯҳӣ, энергетика, металлургияи ранга, саноати вазнин ва дигар соҳаҳо низ таваҷҷуҳ дорад.
Дар навбати худ сафири Корея дар Тоҷикистон ҷаноби Ён Ҷон-Гу изҳор намуд, ки соҳибкорони кишвараш бешубҳа ба ҳамкориҳо бо шарикони тоҷики худ ҳавасманд буда, имзои созишнома ба рушди ҳамкориҳои иқтисодии дуҷониба мусоидат хоҳад кард.
Ба қавли сафир, ҳаҷми муомилоти моли хориҷӣ миёни Тоҷикистон Русия чандон назаррас нест ва он тақрибан 150 млн. доллари ИМА-ро ташкил дода, аз Тоҷикиситон ба Корея асосан нахи пахтаву алюминий содирот шуда, аз Корея ба Тоҷикистон автомобил ва қисмҳои эҳтиётӣ ба онҳо ворид мешаванд, ки ҳудуди 90%-и ҳаҷми муомилот ба воридот аз Корея ба Тоҷикистон рост меояд.
«Ман кӯшиш ба харҷ хоҳам дод, то ки ширкатҳои кореягӣ ба бозори Тоҷикистон роҳ ёфта, сармоягузорӣ кунанд ва аксари ширкатҳои кореягӣ ба таҳқиқоти бозори Тоҷикистон шурӯъ намуда, қабл аз ба ин ҷо омадан ба низоми ҳуқуқии ҷумҳурӣ низ таваҷҷуҳ хоҳанд кард», – зикр кард сафир.
