Паймонкори лоиҳаи «Барқарор кардани зеристгоҳи Регар-500кВ» – ширкати чинии Tabian Apparatus Stoc Co. нимаи моҳи август метавонад бевосита ба корҳои таҷдид ҳусни оғоз бахшад.
Тибқи маълумоти расида ба ОИ «Азия-Плюс» аз Муассисаи давлатии «Маркази идоракунии лоиҳаҳои бахши гидроэнергетика», айни замон паймонкор дастрасӣ ба маблағи пешпардохт дар ҳаҷми 15% аз ҳаҷми умумии маблағи лоиҳаро интизорӣ дорад.
«Барқарор ва азнавсозии зеристгоҳ зарур аст, зеро он ҳанӯз солҳои 70-уми асри гузашта мавриди истифода қарор гирифта, таҷҳизоташ фарсуда шудааст. Тибқи қоидаҳои истифодабарӣ, муддати ҳар 25-30 сол таҷҳизот бояд барқарор ё иваз карда шавад», – иброз доштанд дар муассисаи мазкур.
Ба иттилои манбаъ, аз зеристгоҳи мазкур ба корхонаи бузургтарини саноатии ҷумҳурӣ – Ширкати алюминии тоҷик (ТАЛКО) нерӯи барқ интиқол дода шуда, ҳамчунин хати 220 кВ-и зеристгоҳи «Равшан» низ аз ин зеристгоҳ нерӯи барқ мегирад, ки баҳри таъмини аҳолии шаҳри Турсунзода ва қисман ноҳияи Шаҳринав масраф мегардад.
«Амалисозии лоиҳаи мазкур қабл аз ҳама, таъминоти мунтазам ва устувори навоҳии тобеи марказ бо барқро таъмин намуда, минбаъд имконоти саноатӣ ва кишоварзии ин минтақаро меафзояд. Ҳамчунин таъмини корхонаҳои саноатӣ ва кишоварзии минтақа бо барқи маҳаллӣ беҳтар мешавад», – гуфтанд дар Маркази идоракунии лоиҳаҳо.
Маблағи умумии лоиҳаи «Барқарор кардани зеристгоҳи Регар-500кВ» 37,8 млн. доллари ИМА-ро ташкил медиҳад, ки 5%-и он аз ҳисоби воситаҳои ширкати «Барқи тоҷик» ва боқимонда аз ҳисоби қарзи имтиёзноки «Эксимбонк»-и Чин сармоягузорӣ мешавад. Муҳлати амалисозии лоиҳа 14 моҳ муқаррар шудааст.
