Николай Николаев, адвокати пешвои ҳаракати мухолифи «Гурӯҳи 24» Умаралӣ Қувватов, овозаҳои пайдошуда дар шабакаи Фейсбук оида ба истирдоди зерҳимояи худ ба Тоҷикистонро носаҳеҳ унвон кард.
Адвокат ба ОИ «Азия-Плюс» дар ин робита хабар дод, ки ӯ ҳам аз чанд нафаре дар ин бора шунидааст, вале мутмаин аст, ки «ин овозаҳо асоси воқеӣ надоранд». «Айни замон Қувватов ба масъалаи дуруст кардани макони будубоши наваш машғул аст, ки дар куҷо воқеъ буданаш ба касе маълум нест», – иброз дошт ӯ.
Николаев гуфт, алҳол Қувватов бо ӯ ба тамос намебарояд ва аз сабаби ин низ ӯ алҳол огоҳ нест. «Чанде аз ҳамдиёронаш изҳор карданд, ки бо Қувватов дар кишвари будубошаш суҳбат доштаанд. Ман дидаву дониста ба ин масъала таваҷҷуҳ зоҳир намекунам, агар хоҳиш дошта бошад, хабар медиҳад ва агар хоҳиш надошта бошад ҳам, боке нест. Муҳимаш зиндаву солим будани ӯ аст», – зикр кард адвокат.
Аммо Николаев бар ин назар аст, ки Қувватов «бо канорагирӣ фурсати хеле муҳими пешравӣ дар амалҳоро аз даст медиҳад ва барои сиёсатмадор ин на он қадр хуб аст».
«Фурсати хубе барои ӯ аз даст рафта истодааст ва бо гузашти чанд муддати дигаре тамоми кӯшишҳои ҷомеаи шаҳрвандӣ баҳри раҳоии ӯ аз тавқифгоҳи Дубай барабас хоҳанд рафт», – таъкид дошт ҳимоятгар.
Пас аз 9 моҳи боздошт рӯзи 26-уми сентябр У.Қувватов аз тавқифгоҳи шаҳри Дубайи Аморати Муттахидаи Араб озод шуд. Маълумот дар бораи озодии ӯро Николаев худи ҳамон рӯз дар саҳифаи фейсбукиаш интишор намуда буд.
Дар ҳамин ҳол, ҳукуматдорони тоҷик бовар доштанд, ки Умаралӣ Қувватов ба Тоҷикистон истирдод хоҳад шуд. Ахири моҳи август як манбаъи огаҳ аз ҳукумати ҷумҳурӣ ба ОИ «Азия-Плюс» хабар дода буд, ки масъалаи истирдоди роҳбари «Гурӯҳи 24» Умаралӣ Қувватов метавонад муддати як ҳафта ҳаллу фасл шавад.
«Мо дар тамоми мурофиаҳои судӣ ғолиб омадем, яъне суди зинаи аввал ва таҷдиди назар дар ҳарду ҳолат ҳам ба истирдоди Қувватов ба Тоҷикистон қарор содир намуд. Шикояти Қувватов ва адвокати ӯ рад карда шуд, – иброз дошта буд он замон манбаъ. – Айни замон танҳо масъалахои техникиро ҳал кардан зарур аст».
Аммо муовини прокурори генералии Тоҷикистон Абдурашид Кишварзода ба ОИ «Азия-Плюс» дар ин робита хабар дод, ки аз хабарҳои шабакаи Интернет дар бораи озодии Қувватов
алҳол наметавон комилан тасдиқ намуд
, ки ӯ истирдод намешавад, зеро аз АМА ба Тоҷикистон расман дар ин хусус посухе нарасидааст.
Ёдрас мекунем, ки Қувватов ахири моҳи декабри соли 2012 бо дархости ҳукуматдорони тоҷик дар Дубай боздошт шуд. Ба Аморати Муттаҳидаи Араб ӯ Аз Маскав омада, ният дошт, ки минбаъд сафарашро ба шаҳри Брюссел идома бидиҳад.
Санаи 10-уми марти соли ҷорӣ ҳукуматдорони АМА дархости Душанбеи расмӣ оид ба истирдоди мухолифи тоҷикро рад намуданд. Аллакай рӯзи 14-уми апрел бошад, суд оид ба ватан истирдод шудани пешвои ҳаракати мухолифи «Гурӯҳи-24» қарор содир намуд. Пас аз ин адвокат аз болои қарори суд шикояти кассатсионӣ пешниҳод намуд, ки он санаи 18-уми август баррасӣ шуд. Аммо то имрӯз мақомоти расмӣ дар бораи чӣ гуна қарор қабул шудан нисбати Қувватов аз ҷониби суди Дубай маълумот намедиҳанд.
