Чанде қабл дар шаҳри Берлини Олмон мулоқоти кории вазири энергетика ва саноати Тоҷикистон Гул Шералӣ бо намояндагони ширкати энергетикии олмонии Andritz Hydro доир гардид.
Тавре ба ОИ «Азия-Плюс» аз сафорати Олмон дар ҶТ хабар доданд, зимни мулоқот масоили рушди минбаъдаи ҳамкории дуҷонибаи Тоҷикистон бо ин ширкати олмонӣ дар доираи Ёддошти баимзорасида моҳи марти соли 2013 дар Душанбе баррасӣ шуданд. «Дар гуфтушунидҳо атрофи лоиҳаҳои таъмиру азнавсозии нерӯгоҳҳои Норак ва Варзоб-2 табодули назар сурат гирифт», – шарҳ доданд дар сафорат.
Ба иттилои манбаъ, дар Берлин ҳамчунин Гул Шералӣ бо роҳбарони як қатор ширкатҳои бузурги энергетикии Олмон ва дигар кишварҳои аврупоӣ, ки ба амалисозӣ ва маблағгузории муштарак дар бахшҳои энергетика ва саноати истихроҷи Тоҷикистон ҳавасманданд, низ дидору гуфтушунид намуд.
Ширкати олмонии ANDRITZ HYDRO яке аз бузургтарин истеҳсолкунандагони маҷмӯи пурраи таҷҳизоти электромеханикӣ ва ҳамчунин таъмингари хизматгузориҳо барои нерӯгоҳҳои обӣ-барқӣ буда, аз ширкатҳои пешсаф дар бозори ҷаҳонӣ оид ба таъмини таҷҳизот барои тавлиди энергияи гидравликӣ маҳсуб меёбад.
