Алимурод Маханов, маъруф ба «устод Муродуллоҳ» ва яке аз афроди гурӯҳи муташаккили мусаллаҳи террористӣ, ки аз ҷониби ВКД дар давраи интимхоботи президентии кишвар боздошт гардид, дар ҷараёни мурофиа гуфтааст, ки дар ҷинояте, ки муттаҳҳам мешавад, қисман худро гунаҳкор медонад.
Умедҷон Бобоҷонов – вакили мудофеъи Алимурод Маханов рӯзи 19 декабр пас аз мурофиа гуфт, «Алимурод Маханов тибқи Кодекси ҷиноии Тоҷикистон бо 6 моддаи марбут ба терроризм ва ҳамкорӣ бо гурӯҳҳои муташаккили ҷинояткорӣ гумонбар дониста мешавад.
Ба гуфтаи Бобоҷонов, имрӯз ҳаракатҳои тафтишоти парвандаи мазкур ба охир расид ва худи Алимурод Маханов пурсида шуд, ӯ қисман худро гунаҳгор донистааст. Аз ифшои ҷузъиёти дигар бинобар сабаби ба сирри давлатӣ вобаста будани он адвокат худдорӣ варзид.
Ба қавли адвокат, Алимурод Маханов дар ҷараёни мурофиа дар мавриди шахсони дар парванда зикргардида, ки гӯё онҳоро ба терроризм даъват намудаааст, иброз доштааст, ки ин дурӯғ буда, ӯ онҳоро барои омӯзиши илми динӣ даъват намудааст.
Аммо шоми 23 уми сентябр Алимурод Маханов, тавассути барномаи Шабакаи аввали телевизиони Тоҷикистон гуфта буд, мехостанд чаҳор дарвозаи Душанбе, бинои Вазорати умури дохилӣ ва Кумитаи амнияти миллиро дар арафаи интихоботи президенти моҳи ноябри соли ҷорӣ битарконанд.
Дар ин барнома худи Маханов гуфта буд, ки аз соли 2011 ба узвияти Ҳаракати исломии Ӯзбекистон шомил шуда, раҳбарии гуруҳи ҳаштнафареро, ки муташаккил аз шаҳрвандони Туркия, Қирғизистон ва Узбакистон мебошад, бар зимма доштааст. Ӯ гуфта буд: «Ман бачаҳоро барои омӯзиш ба Вазиристони Покистон равон мекардам, ки миёни онҳо шаҳрвандони Тоҷикистон низ мебошанд».
