Тоҷикистон аз рӯйхати «кишварҳои хатарнок» хориҷ шуд – акнун низомиёни амрикоие, ки дар Тоҷикистон адои хизмат мекунанд, барои хизмат дар «дар макони хатарнок» дар ҳаҷми 7,5 $ дар як шабонарӯз ё худ 225 $ дар як моҳ пардохтпулии иловагии таъиншударо намегиранд.
Бино ба иттилои
сомонаи расмии
Вазорати мудофиаи Иёлоти Муттахидаи Амрико, санаи 3-юми январи соли равон вазорат дар бораи муайян кардани дараҷаи хатарнокии баъзе макони ҷаҳон санҷиш (сертификатсия)-и такрорӣ эълон намудааст.
Ба иттилои манбаъ, аз 1-уми июни соли равон 9 қаламрав ба сафи макони амн шомил мегарданд, ки миёни онҳо кишварҳои минтақаи Осиёи Марказӣ – Тоҷикистон, Қирғизистон ва Ӯзбекистон, ҳамчунин давлатҳои Тимори Шарқӣ, Гаити, Либерия, Уммон, Руанда ва Аморати Муттаҳидаи Араб низ дарҷ ёфтаанд.
Гуфта мешавад, сабаби аслии бозбинии рӯйхати «кишварҳои хатарнок» ба мушкилоти молиявӣ дучор шудани ИМА аст. Дар рӯйхати «кишварҳои хатарнок» танҳо давлатҳои Ироқ, Афғонистон, Лубнон, Урдун, Покистон, Сурия, Яман ва Миср боқӣ мемонанд.
