Дар гуфтушуниди имрӯзаи намояндагони Тоҷикистону Қирғизистон бори навбатӣ ҷиҳати аз байн бурдани ташаннуҷи вазъ дар муносибатҳои дуҷониба, ки дар натиҷаи муноқишаи мусаллаҳонаи рӯзи 11-уми январ дар марз ба амал омад, кӯшиш ба харҷ дода мешавад. Дар ин бора ба ОИ «Азия-Плюс» як манбаъ аз ҳукумати вилояти Суғд хабар дод.
Бино ба иттилои манбаъ, гуфтушунидҳо дар Исфара ё Ботканд баргузор мешаванд ва ин масъала мавриди баррасии ҷонибҳо қарор дорад.
Аллакай маълум аст, ки ҳайати Тоҷикистонро дар ин гуфтушунид ёвари президенти ҶТ оид ба масоили амнияти миллӣ Шералӣ Хайруллоев, раиси Кумитаи заминсозӣ ва геодезияи ҶТ Маҳмадтоҳир Зокиров, фармондеҳи нерӯҳои марзбонии КДАМ ҶТ генерал-лейтенант Раҷабалӣ Раҳмоналӣ ва дигар мансабдорони воломақоми сохторҳои қудратии кишвар намояндагӣ мекунанд.
«Ҳамаи шахсони зикршуда аз субҳи имрӯз дар Исфара қарор доранд», – афзуд сарчашмаи хабар.
