Аз аввали моҳи феврал дар назди Вазорати мудофиаи ҷумҳурӣ нахустин мактаби омодакунии прапоршикҳо ба фаъолият оғоз кард.
Бино ба иттилои сомонаи расмии Вазорати мудофиаи ҶТ, дар курсҳои таълимии мактаби мазкур сарбозоне, ки муддати якуним сол дар сафи Артиши миллии кишвар хизмат намудаанд ва шаҳрвандоне, ки айни ҳол дар эҳтиёт мебошанд, дар асоси шартномаи тарафайн ба омӯзиш фаро гирифта мешаванд.
«Айни замон, дар маркази таълимии мазкур аз рӯйи 8 ихтисос мутахассисон омода карда мешаванд, ин ҳам бошад, старшинаи рота, тирандози савора дар техникаҳои зиреҳпӯши ҳарбӣ, мошинҳои ҷангии пиёданизом, танк, сардори анбор, механики авиатсионии ҳавопаймо ва чархбол, сардори радиостансия ва стансияҳои радиолокатсионӣ, техник-сардори дастаи зенитиву ракетӣ ба роҳ монда шудааст, ки пас аз анҷоми курсҳои кӯтоҳмуддат хатмкунандагони он вобаста ба ихтисос ба сафи Қувваҳои Мусаллаҳ даъват шуда, бо ҷои кор таъмин карда мешаванд», – гуфта мешавад дар хабари вазорат.
Ба иттилои манбаъ, инчунин ба курсҳои кӯтоҳмуддати таълимӣ сарбозоне, ки маълумоти миёна ё миёнаи касбӣ доранду аз хизмати ҳарбиашон як солу шаш моҳ сипарӣ гаштааст, тибқи хоҳиши таҳсил ба мактаби прапоршикӣ шомил карда мешаванд.
Зимнан зикр мегардад, ки барои таълимгирандагони мактаб дар дохили бинои таълимӣ шароитҳои хуби маишиву хизматӣ муҳайё карда шудаанд.
