Ахири ҳафтаи гузашта вазири мудофиаи Тоҷикистон генерал-лейтенант Шералӣ Мирзо бо вазири мудофиаи Чин генерал-полковник Чан Вансюан, ки бо сафари расмӣ ба Тоҷикистон ташриф овард, гуфтушунид анҷом дод.
Тавре ба «Азия-Плюс» сардори маркази матбуоти Вазорати мудофиаи ҶТ Фаридун Маҳмадалиев хабар дод, дар мулоқот масъалаҳои ҳамкорӣ дар соҳаҳои ҳарбӣ, низомиву техникӣ, омодакунии кадрҳои афсарӣ барои артиши Тоҷикистон ва ҳамчунин таъмини амният дар минтақа баррасӣ шуданд.
«Ҷониби Чин нақши Тоҷикистон дар таъмини амният дар минтақа ва ҳамчунин дар бахши мубориза бо терроризмро шоиста арзёбӣ намуда, ҷониби Тоҷикистон изҳор дошт, ки дар тамринҳои низомии муштараки тобистони соли равон дар Чин ҳатман ширкат хоҳад варзид», – иброз дошт манбаъ.
Чан Вансюан ва Шералӣ Мирзо ҳамчунин бо ҷараёни анҷоми сохтмони Хонаи афсарон дар шаҳри Душанбе, ки бо воситаҳои молиявии Чин бунёд мегардад, аз наздик ошно гардиданд.
Маҳмадалиев хотиррасон намуд, ки сохтмони Хонаи афсарон соли 2012 оғоз гардида, барои бунёди он Чин ба сифати бурс ҳудуди 12 млн. доллари ИМА маблағ ҷудо кард.
Нимаи дуюми имрӯз вазири мудофиаи Чинро президенти Тоҷикистон Эмомалӣ Раҳмон ба ҳузур мепазирад.
