Рӯзи 17-уми май дар мактаби таҳсилоти миёнаи умумии №89-и ноҳияи Синои пойтахт аз фанни забони олмонӣ олимпиада баргузор мешавад.
Тавре ба «Азия-Плюс» аз Раёсати маорифи шаҳри Душанбе хабар доданд, олимпиада аз ҷониби маъмурияти мактаби №89 бо дастгирии сафоратхонаи Олмон дар Тоҷикистон созмон дода мешавад.
«Айни замон танҳо дар шаҳри Душанбе дар 61 синф забони олмонӣ меомӯзанд. Шумори умумии толибилмоне, ки ба омӯзиши ин забон машғуланд, 1 ҳазору 776 нафарро ташкил дода, 832 нафарашон духтаронанд. Омӯзиши забонҳои хориҷӣ дар мактабҳои Тоҷикистон аз синфи 3 оғоз мегардад», – гуфтанд дар раёсат.
Ба иттилои манбаъ, аллакай тобистони ҳамин сол ғолибони олимпиада дар олимпиадаи байнулмилалӣ оид ба забони олмонӣ иштирок мекунанд. Олимпиадаи миллӣ оид ба аз ҳама беҳтар азхуд кардани забони олмонӣ аз ҷониби сафоратхонаи Олмон дар Душанбе, Институти Гёте дар Тошканд, Идораи марказӣ оид ба маълумоти мактабӣ дар хориҷа (ZFA), Хадамоти Олмон оид ба табодули академӣ (DAAD) бо мусоидати Маркази забонҳо оид ба омӯзиши забони олмонӣ дар шаҳри Душанбе барпо карда мешавад.
