Сафири Ҷопон дар Тоҷикистон Хироюки Имахаши ба Китобхонаи миллии ҷумҳурӣ беш аз 700 нусха китобу маҷалла ва ҳамчунин мусаввараҳо тақдим намуд.
Бино ба иттилои расида аз Китообхонаи миллӣ, дар маросими тақдими китобҳо директори китобхона Носирҷон Салимов ба сафир изҳори миннатдорӣ намуда, зикр кардааст, ки минбаъд ҳамкориҳо дар ин самт идома меёбанд.
«Китобҳои туҳфашуда аз асарҳои бадеӣ, асарҳо барои кӯдакон ва адабиёти тиббӣ иборат аст. Ҳамчунин китобҳо дар бораи таърих, ҷуғрофия ва сиёсатшиносӣ низ мавҷуданд. Ҳамаи китобҳо бо забони англисӣ ва ҷопонӣ мебошанд», – хабар доданд аз Китобхонаи миллӣ.
Зимнан зикр гардид, ки ба муносибати тақдими чунин миқдори бузурги китобу маҷалла дар шуъбаи адабиёти хориҷии китобхона гӯшаи адабиёти Ҷопон ифтитоҳ гардидааст.
