Дипломати тоҷик Рустам Маҳмудӣ, ки нимаи моҳи май ба автомашинааш дар музофоти Қундузи Афғонистон ҳамлаи мусаллаҳона сурат гирифта буд, ба шаҳри Душанбе оварда шуд.
Тавре аз Вазорати корҳои хориҷии ҷумҳурӣ хабар доданд, айни замон Рустам Маҳмудӣ дар Маркази миллии тиббӣ муолиҷа мегирад.
Ёдрас мекунем, ки шоми рӯзи 16-уми май ба автомашинаи консули Тоҷикистон дар музофоти Бадахшони Афғонистон Рустам Маҳмудӣ ҳамлаи мусаллаҳона сурат гирифт. Ҳамлаи мусаллаҳона ба автомашинаи консул дар вилояти Қундуз анҷом пазируфта, дар натиҷа Рустам Маҳмудӣ аз дасти рост ва пояш захмӣ шуд. Дар шаҳри Қундуз ӯро табибони ҷопонӣ ду маротиба ҷарроҳӣ намуданд.
Ба тафтиши ин ҳодиса мақомоти ҳифзи ҳуқуқи Тоҷикистону Афғонистон машғуланд. Алҳол дар ин бора маълумоти расмӣ дода нашудааст. То ҳанӯз ҳеҷ касе ё гурӯҳе масъулияти ин ҳамларо ба дӯш нагирифтааст.
Қобили зикр аст, ки айни замон дар Кобул сафоратхонаи Тоҷикистон ва дар шаҳрҳои Мазори Шариф, Қундуз ва Файзобод консулгариҳои Тоҷикистон амал мекунанд.
