Имрӯз дар толори Театри давлатии академии опера ва балети ба номи Садриддин Айнӣ маросими ифтитоҳи Рӯзҳои фарҳанги Туркманистон дар Тоҷикистон баргузор мегардад.
Тавре аз Вазорати фарҳанги ҶТ хабар доданд, қабл аз маросими ифтитоҳ дар фойеи театр намоиши санъати тасвирӣ, аккосӣ ва ҳунарҳои мардумии Туркманистон доир мегардад. «Ҳайати Туркманистон таҳти раҳбарии директори Маркази давлатии фарҳанги ин кишвар Керимгули Гаровов аз 60 нафар иборат аст, ки ба он кормандони Вазорати фарҳанги Туркманистон, мусиқачиён, ҳунармандони театр, сароянагони опера ва дигар намояндагони аҳли ҳунару фарҳанги ин кишвар шомиланд», – гуфтанд дар вазорат.
Ба иттилои манбаъ, санаи 5-уми август сафари ҳайати Туркманистон ба шаҳри Ваҳдат дар назар буда, дар он ҷо консерти ҳунармандони туркман баргузор мешавад ва сипас меҳмонон аз дараи хушманзари Ромит боздид мекунанд.
Рӯзи 6-уми август меҳмонон аз Туркманистон дар боғҳои Парчами миллӣ, Нишони давлатӣ ва ба номи Абӯабдуллоҳи Рӯдакӣ сайругашт мекунанд ва шоми ҳамон рӯз дар саҳнаи Театри давлатии академии опера ва балети ба номи Садриддин Айнӣ барномаи хотимавии ҳунармандони Тоҷикистону Туркманистон барпо мегардад.
