Президенти Муғулистон Тсахиагийн Элбэгроҷ рӯзҳои 11-12-уми сентябр аз Тоҷикистон боздид намуда, дар кори нишасти сарони кишварҳои узви Созмони ҳамкории Шанхай ширкат меварзад.
Тавре ба «Азия-Плюс» як манбаъ аз ҳукумати ҷумҳурӣ хабар дод, дар ҷараёни сафари президенти Муғулистон ба Душанбе дидору гуфтушуниди ӯ бо сарвари давлати Тоҷикистон Эмомалӣ Раҳмон дар назар аст.
«То имрӯз кишварҳои дорои мақоми нозир дар Созмони ҳамкории Шанхай (СҲШ) – Афғонистон ва Ҳиндустон намояндагони ҳайатҳои худ барои иштирок дар нишасти СҲШ дар Душанберо муайян накардаанд», – гуфт манбаъ.
Ба иттилои манбаъ, кишварҳои дигари нозири созмон – ҳайати Эрону Покистонро дар нишасти Душанбе мутаносибан президенти Эрон Ҳасан Рӯҳонӣ ва нахуствазири Покистон Навоз Шариф раҳбарӣ мекунанд.
Ҳайатҳои давлатҳо дар нишасти сарони кишварҳои узви Созмони ҳамкории Шанхайро, ки рӯзҳои 11-12-уми сентябр дар шаҳри Душанбе доир мегардад, президенти Русия Владимир Путин, раиси Ҷумҳурии Мардумии Чин Си Ҷинпин, президенти Қазоқистон Нурсултон Назарбоев, президенти Қирғизистон Алмазбек Отамбоев, президенти Ӯзбекистон Ислом Каримов ва президенти Тоҷикистон Эмомалӣ Раҳмон сарварӣ хоҳанд кард.
Зимнан зикр гардид, ки дар доираи иштирок дар кори нишасти СҲШ сарони кишварҳои Эрону Чин ва Қирғизистон сафарҳои расмии худ ба Тоҷикистонро анҷом медиҳанд.
Ба андешаи коршиносони байнулмилалӣ, Муғулистон, ки имрӯз дар СҲШ мақоми нозирро дорад, барои узви комилҳуқуқи созмон шудан дар нишасти навбатии сарони кишварҳои узви СҲШ соли 2015 дар Русия афзалияти бештар дорад.
